【照片背後】 –《大帽山白果》

Posted on

上大山食正雲,無景就食白果?No way!

早幾日同幾位朋友凌晨上左大山諗住搏日出雲海,結果食晒雲,仲大風到傻,連機都唔係好敢拎出黎。雖然出發前都知白果味濃,但因為要趕住歸還一件特別器材,所以都要焗住上,希望拍到D野。

世上當然無咁易有奇蹟。我地一行人天未光的士上到停車場,食雲食到飽後再行落山,去到蓮姐度諗住啪個麵補充下,結果比我地見到短暫嘅開天!

拿,比著你會點揀?我地就決定拿拿林啪埋個麵再衝多次上山。係呀,今次係行上去,因為等車都唔知等到幾時。最後再次迎來第二粒白果,去到停車場已經迷矇一片。於是乎又再行返落山。

呢張相係第一次落山途中影的。其實雲霧本身都好有氣氛,佢可以強化景物嘅距離感,因為喺雲霧中,唔同距離嘅景物會有好唔同嘅深淺層次。雲霧嘅神秘感亦係其他天氣比唔到的。試諗下呢張相如果係清天之下影,應該會好平平無奇呢。

臨到停車場前有一段直路,雖然唔係好長,但喺雲霧之下就好似無盡咁。我覺得呢個場景好靚,就停低落黎set機拍。

一點透視我一向都好鍾意,因為佢好似有種拉觀眾入畫面嘅力量。加埋見唔到盡頭嘅路就更加引人幻想。雖然我呢個動作好gag,唔係好match個氣氛,但我覺得呢個畫面好係「我」,就算面對嚴峻同未知嘅環境,都會輕鬆笑對,拋黎拋去。拋起左嘅機亦莫名地有種超現實感,好配合神秘嘅背景氣氛😂順帶一提,拋起果舊係我用黎拍vlog嘅action cam組合。

背囊係一如以往嘅重。唔係,其實係比平日更重,因為要用到件神秘器材,所以帶多左野。果件野係乜?暫時賣個關子,提示係鍾意影風景嘅Fujifilm用家應該會感興趣嘅。遲下實會開估嘅,放心啦~

Leave a Reply